DEAN PARRISH

Martxoak 13, ostirala - Gazteszena aretoa - 22.35etan 

Sarrera: 23/ 42€

 

 

 

 




CAROLYN CRAWFORD

Martxoak 13, ostirala - Gazteszena aretoa - 00.00etan - Sarrera: 23/ 42€

 

Detroiten jaiotako Carolyn Crawford, Motown-eko harribitxi gazteetako bat izan zen  konpainiaren lehenengo urte arrakastatsuetan. Talentu-lehiaketa bat 1963an irabazi ondoren, eta artean 13 urte besterik ez zuela, Berry Gordy-ren zigilu famatuan leku egin zioten. Bertan hiru diska argitaratu zituen eta abestien artean neskatxak berak sortutakoak zeuden, bere izugarrizko dohainaren adibide zirenak. Horrez gain, kontaezinezko materiala grabatu zuen; zoritxarrez, eta Hitsville-n ohikoa zenez, ez zen hainbat hamarkada igaro arte plazaratu. Salmenta-arrakasta baten gabeziak, gaztetasunak eta Motown-ek ezarritako baldintzei muin egin nahi ez izateak, zigilutik bat-bateko eta uste baino lehenagoko irteera ekarri zioten. 

 

Urte batzuk beranduago "Hodges, James, Smith and Crawford” emakume-taldeko partaide izan zen, Hammilton Bohannon-entzako lan egin zuen eta bakarlari ibilbideari bigarrenez ekiteko aukera suertatu zitzaion. Honek guztiak uzta oparoa eman zion, hainbat arrakasta erdietsiz eta R&B diska salduenen zerrendetan azalduz.

 

Mojo Workin’-erako, Motown-en 60ko hamarkadan grabatutako abestien zerrenda fina prestatu digu, argitaratu zein argitaratugabeko materialaz osatua. Baina hortaz aparte, zale donostiarren gozamenerako izango diren ezusteko zenbait prestatu ditu.   




RUBY ANDREWS

Martxoak 14, larunbata - Gazteszena aretoa - 22.35etan 

Sarrera: 25/ 42€

 

Ruby Andrews Mississippiko Hollandale herrian jaio bazen ere, ume zelarik bere sendiarekin Chicagora aldatu zen. 60ko hamarkadan zehar, Haizearen Hiriko soul-ak bere urrezko garaia bizi zuenean, izen handietako bat bihurtu zen. Horren lekuko dira R&B zein Pop arrakasta-zerrendetan bere izenak izan zituen agerpenak. 

 

Ric Williams-ek gidatutako Zodiac Records zigilu famatuan ondare txukuna utzi zuen, 15 single-z eta bi albumez osatua. Bere ekoizpenetan balada zoragarriak eta dantzalekura bideratutako abestiak topa daitezke, oraindik orain mundu osoko soul-maitaleen artean ospea dutenak. Ondoren, arrakastaz betetako bigarren aro bat burutu zuen, oraingoan ABC Records-en, zaleen artean ere leku berezia duena. 

Industria diskografikoan izandako emakume borrokalari eta  langilearen adibide bikaina dugu Ruby. Izaera horrek fruituak ekarri dizkio, baita egun ere: azkeneko hilabete hauetan Zodiac Records-en katalogoaren legezko jabe bihurtu da, helburu bikoitza betez: alde batetik, zigiluarentzako lan egin zuten baina gaur arte saririk jaso gabe zeuden artistekin zegoen zorra kitatzea erdietsi du; aldi berean, abeslari-ibilbideari berrekin dio, Chicagoko soularen soinu errepikaezina belaunaldi berriei helarazteko asmoz.




CHRIS CLARK

Martxoak 14, larunbata - Gazteszena aretoa - 00.00 etan

Sarrera: 25/ 42€

 

Zalantzarik gabe, Chris Clark dugu Motown-eko diba handienetako bat. Berry Gordy-k 60ko hamarkadan begiz jo zuen, eta haren ahotsak zituen dohain handiei esker, artista preziatuenetako bat bihurtu zen azkar batean. Motown-eko hainbat zigiluetan single-sorta ederra argitaratu zuen, baita bi LP ere. “Love’s Gone Bad” edo “If I Should Walk Away” bezalako abestiek R&B eta Pop arrakasta-zerrendetan lekua egin zioten zenbait alditan, zaleen eta kritikaren txalo artean.

 

Zigiluaren konposatzaile eta ekoizle ugarirekin aritu zen; kuttunetako bat, zalantzarik gabe, Frank Wilson izan zuen, norther soul-aren historian abestirik ezagunena bihurtu den “Do I Love You”-ren egilea. Chris Clark-ek ere kanta horri bere ekarpena egin zion, urte askoan ilunpetan egon den demo bat grabatu baitzuen.

 

Dagoeneko, gure zaleek badakite Motown-en materialak eta Mojo Workin’-eko musikari-banda osatzen duten The Individuals taldeak modu ezinhobean bat egiten dutela. Hori dela eta, Chris-en kontzertua 2020eko ekitaldiari amaiera emateko modu bikaina izango da.